• الرئيسية
• رأي

مجرد وجهة نظر حوالين الأنظمة التعليمية حاليا ولو ميهمكش متشغلش بالك،كتبتها من فترة ومحبتش أنزلها ولكن مش قادر أمنع نفسي من التعليق علي كمية الاستحقاقية الغير مبررة والغير مستحقة اللي بقت موجودة عند الطلبة والأهل والمدرسين علي حد سواء، همسة في أذن الصغير والكبير، ولست ذا قدر لتوجيه النصح ولكن عل وعسي أن ينتفع بها أحد.

التعليم ليس حكرا علي أحد ولا يعتمد بشكل أو آخر علي المعلم مع كامل احترامي لأساتذتنا الأفاضل، واللي بتعلم منهم لحد انهارده ولكن الطالب بمجهوده الشخصي يستطيع أن يتعلم لوحده معتمدا علي نفسه وحتي تفيض روحه إلي بارئها، العلم الدنيوي ليس قرآنا يحتاج إلي تلقي بل هو علم لتوسيع المدارك يحتمل أن يخطأ الطالب ويصيب ودائما هو علم متجدد لا يصح تثبيت العقل أو تنشيف الدماغ فيه.

ونظرا أنه هذا ليس العرف السائد في مجتمعنا في القرية وأنه الطالب منذ ولادته بيلاقي نفسه محاط بالمدرسين والدروس التي تثقل كاهله هو وأهله فأنا أحب أقول أن الطلبة فالأماكن الآخري ولحد ٣ اعدادي ميعرفوش يعني أي دروس وفي أماكن ودي شفتها بعيني الطالب بيدخل ثانوي ويخرج منه محقق حلمه (حلمه هو مش حلم أهله، حضرتك مش هتتعلم مكانه ولا هتشتغل مكانه ولا في موقع وهو عنده ١٨ سنة إنك تمحي شخصيته) وما اشتركش عند ولا مدرس ودي مش ذكاء من الطالب ده توفيق من ربنا واجتهاد من الطالب وما أكثر شروحات المناهج جمعاء علي الإنترنت.

الطالب في مرحلة نموه محتاج يتعلم أسس دينه وأسس تربية سليمة وازاي يعتمد علي نفسه وازاي يكونوا أهله داعمين ليه ويربوه تربية حسنه، ولكن الواقع عكس ذلك أن الطالب بمجرد دخول الدراسة بيروح المدرسة ومن المدرسة للدرس وولي الأمر بيدفع الشهرية ويشوف الواد بيعمل الواجب مثلا ولا لأ ولو مش فاضي هيسأل المدرس عليه ويظن أنه كده قدم للولد أو البنت اللي هو محتاجه.

في الواقع حضرتك مقدمتش أي حاجة لأن المدرس مش هيغني عن الأب أو الأم والولد مش المفروض يطمن لشخص ماسكله عصاية ويقوله انه مش فاهم ليه 2x3 يساوي 6 مش بـ 5، ثم يطلع عندنا طالب معقد ومعتمد علي الدروس ومش بيذاكر ونقعد احنا مش فارق معانا درجاته لحد ما يبقي اعدادية نبقي عايزينه يخش ثانوي أو يجيب مجموع وندخله مدرسة تانية واهو يتعلم حاجة يشتغل بيها. وطبعا مفيش مقدمات علشان يكون في نتائج يبقي نلجأ أننا نغشش الطالب.

أو الحل التاني هندلع الطالب ونعمله الواجب ونعلمه ميعتمدش علي نفسه علشان ده لسه طفل والوزير ابن الايه هو اللي بيعقد الطلبة والمدرسين. والحقيقة ودي شهادة اتسأل عنها قدام ربنا أن الوزير الحالي من أنشط الناس اللي مسكت الوزارة وبيحاول علي أصعدة كتير جدا طبعا الناس مش مهتمه بيها وبتبص لنفسها بس ولكن دي شهادة حق الواحد لازم يقولها وطبعا لينا الظاهر وما خفي عند الله.

بعيدا عن الحرمانية واللي كل الناس عارفاها وبعيدا عن أن الناس عندهم استحقاقية غير مبررة لأمور ولا هما ولا ولادهم بذلوا فيها مجهود ولكن هل وصلنا لمرحلة اتهام طالب بأنه بيمنع الغش فاللجنة انه كده بيعمل مشكلة؟

يعني ده حصل وطلعت إشاعات كتير لما كنت في اعدادي أنه تم نقل مكان الامتحانات علشان انا مضايق أنه الناس بتغش ومع أنه محصلش مني الكلام ده بس هل لو ده حقيقي دي حاجة تزعل؟

ثم وباستحقاقية غير مبررة عند الطلبة يكون ناجح بالغش في اعدادي ويدخل ثانوي وعايز يبقي دكتور وأهله كمان مقتنعين أوي والسبب أصل ده بياخد دروس بكذا كذا والله المُعلم مش هيكون الطالب ولا هيدخل يحل مكانه ولا عمره هيخاف علي مصلحة الطالب أكتر من الطالب نفسه ولو قال أنه هيعمل كده، الطالب هو المسؤول الأول والآخير عن مستقبله وهو المتحكم فيه بكل الأشكال.

نرجع بقا خطوة للوراء وننظر للي قدمته دروس اللي اخدها الطالب من ابتدائي لحد ما يخلص اعدادي هل الطالب كما يزعم البعض أتأسس صح؟ هو يعني أي اصلا اتأسس صح أي الأساس في نظركم؟ هل الأساس هو جدول الضرب اللي بياخده ولا شوية المعلومات اللي هتتغير كلها في كل مرحلة سنية بيدخلها علشان يواكب تتطور العلم والعلوم؟ والله أبدا إنما الأساس هو الأخلاق والتربية اللي هيبني بيهم علمه باقي حياته.

طيب الطالب وصل ثانوي وبقا لازم ياخد فالمادة درس واتنين وأصل المادة دي صعبة ودي مستحيلة أولا المناهج المصرية هي من أضعف المناهج العالمية في مرحلة الثانوية العامة وعلي استعداد إني أتحدي الجميع وبالأدلة في أنها ضعيفة علميا وأنه الطلبة بره مناهجهم أصعب، وده مش معناه أنه درجاتهم أحسن بل إنهم فالأغلب مش كويسين والطالب المصري أحسن منهم ولكن ده مش معيار تقييم المنهج. يبقي المشكلة فين أن الطالب مش بيعمل اللي عليه لأنه متزرعش جواه يعمل اللي عليه هو بس يعرف أنه يذاكر علشان ينجح في أولي وتانية اصلهم مش شهادة وتالته يحلها ربنا وفيه اللي مش بيذاكر أصلا لأنه هيغش وينجح.

وبعد كده يدخل تالته ثانوي وأهله يضغطوا عليه عايزين طب وهندسة قال يعني دول نهاية العالم وبعدين ١٠٠ درس واونلاين واوفلاين ودنيا وفالآخر اصل مجبش مجموع الوزارة بنت اللذينه جايبه امتحان محصلش فالتاريخ والطالب يعيني مظلوم وهندخله خاص. حقيقي عقلية كل هدفها تبرير الخطأ دون العمل علي حله وده اللي زرعوه في ولادهم وبيحصدوه. المجتهد مش بيحاول يبطل يبقي مجتهد من أول يوم لآخر يوم ده جزء من هويته أنه بيعمل اللي عليه والباقي علي ربنا. "ومن يتوكل علي الله فهو حسبه"

لا مبرر لطالب متعبش طول حياته وجاي في تالته ثانوي وعايز طب وهندسة ويدخلهم ولا مبرر لأهله اللي ميعرفوش أي حاجة عن مجهوده طوال 11 سنه تعليم يكلموه في ناتج السنة ال 12، أنا لا أحكم علي أحد ولست في موقع حكم وقد نئيت بنفسي مدة الثانوية العامة كاملة والتي لا يعلم تفاصيلي فيها غير أنا وأهلي وشكرا ومش مطلوب مني أشاركها مع حد. نتيجتي لنفسي مجموعي لنفسي واجتهادي لنفسي وكليتي لنفسي وشغلي لنفسي وأنا لأهلي وفقط. فأرجو منكم ان الناس تهون علي نفسها وتحاول تصحح المفاهيم الخطأ وتدعم أولادها بدل مساعدتهم علي الغش.

ثم ماذا بعد الثانوية العامة دخل الكلية ف كده خلاص يبطل تعليم يعني ولا يبطل مذاكرة؟ والله بشوف طلبة لا يستحقوا المكان اللي هما فيه ولا بيجتهدوا فيه وبيغشوا بكل الطرق ويبقي زعلان لما بيشيل مواد وولي الأمر مش فارق معاه المهم الولد دخل الكلية إلا من رحم ربي. والقسم التاني بقا الناس اللي عايزه تاخد كورسات بفلوس قد كده علشان هو كده هيفهم أحسن أو اتعود حد يشرحله في حين أنه له زميله بيحوش الفلوس دي وبيذاكر مع نفسه وبيشوف ازاي يكمل تعليمه بره وياخد منحة ويجتهد أكتر وأكتر الفرق في العقلية ده مكنش وليد الصدفة ولا اللحظة ولكن وليد مجهود سنين من الأهل أولا واجتهاد الابن ثانيا.

أما مسألة أن المدرس البعيد سره باتع وهيخلي الولد موجه المادة أو هيديله الامتحان ما هو إلا تكملة للنهج الخاطئ. وكمان مسألة انتشار المدرسين بكل فئاتهم وأعمارهم، هي نصيحة واحدة استقيموا يرحمكم الله، وسيبوا العيش لخبازه ولينظر كل واحد منا في ما آتاه الله.

أما عن امتحانات الثانوية العامة فكل عام نري كل ذلك الجدل ومفيش حاجة تتقال غير من زرع حصد وأن ربنا هو الموفق في الأول والآخير، أما عن نظام البكالوريا العام القادم فإنه نظام يهدف إلي تحسين الأوضاع وهو كذلك علي الورق ولا أري لهذا الوزير إلا محاولات سعي جاهدة اسأل الله له فيها التوفيق والسداد ومش هدفي أطبل لحد والله اللي شايف الراجل بيعمل أي بعين الحقيقة هيقول ربنا يعينه.

والشيء بالشيء يذكر، نري كثيرا من أولياء الأمور يتهكمون علي المعلمين لو قالوا أن امتحان الثانوية كان سهل لازم المدرس يطلع يقول امتحان مستحيل والوزارة بتموت ولادنا ورفقا بالطلبة وحالاتهم النفسية وأهلهم. وبعيدا عن مدي قذارة أنك تتهتم حد في شغله وأكل عيشه لمجرد أنه أبدي رأيه وحضرتك ولا متخصص ولا ليك علاقة بالمادة وسمعت ورددت عذرا زي البغبغان، حضرتك لو الامتحان فعلا صعب ف هو صعب علي الجميع مفيش معني من أنك تفتكر العكس إلا لو منتظر من ابن حضرتك يبقي زويل وهو إمكانياته متكملش وبعد ما ربنا يبينلك ده تبقي مصمم تدخله خاص وتدفع دم أهلك ووالله شفت ناس بعيني شايلين بال ٥ مواد كل ترم علشان هو مش بيذاكر ومش هيذاكر، وحضرتك قاعد تبص لمكانة اجتماعية وكلام فاضي.

ومن المضحكات المبكيات هو انسياق معلم وراء الترند وانه ينسي ضميره ويطلع يقول اللي الناس عايزه تسمعه ولما حد من نفس مهنته يرد عليه ويبين انه رأيه مش ف محله يرد عليه نصا ويقوله "أصل احنا مش بنخاطب المتفوق وعايزين نشجع الطالب المتوسط وتحت المتوسط" نقوم نضحك عليه ونقوله ان العيب فيهم مش أن ده مستواك الحقيقي.

أما عن مدرستي STEM وقد بينت ذلك في منشور سابق المدرسة لم تعد كسابق عهدها وأصبح تضييق الخناق علي طلبتها شديد جدا ولكن هناك تغيير هذا العام سنعلم فائدته بعد نهاية العام ان شاء الله ونرجو أن يكون في مصلحة الطالب المتفوق اللي طلع عينه هو وأهله، ونسأل الله التوفيق والسداد لجميع الطلبة.

وعلشان ده سؤال بيتسألي كتير، لو رجع بيا الزمن كنت هسيب أهلي وأدخل STEM واتغرب واتمرمط فالمدرسة وبعد المدرسة من تنسيق الحكومة؟ اه كنت هعمل كده أنا اشتريت التعليم اللي اتعلمته والإنسان اللي بقيت عليه مش أي حاجة من المرمطة ولا التنسيق. طبعا ده مش عدل ولكن الحياة في مجملها مش عادلة لما المتفوق يكون بياخد فتات الأماكن أمام طلبة الثانوية العامة ولكن ربنا قادر ينصف المجتهد في كل زمان ومكان.

أرجو أن أكون وُفقت في تبيين الوضع وإيصال وجهة نظر محضة ولا أبتغي بيها أي شيء سوي إرضاء ضميري أمام الله عز وجل.

وقبل ما أي حد يقول أن النظام الثانوي العام أصعب، عدد امتحانات تخرج ستيم 14 امتحان تضاف للمجموع بواقع منهج الـ 3 سنين في المدرسة، الثانوي العام 5 وعام دراسي واحد.

وفالنهاية البلد مش ناقصه دكاترة ولا مهندسين وكلهم بيسافروا زي ما حضراتكم شايفين بلاش تضحي بابنك علي حساب مظاهر فارغة.